TUGUEGARAO CITY, Cagayan , Philippines — Isang umano’y karnaper ang bumulagta matapos manlaban sa mga nagrespondeng pulis nang mang-agaw umano ng motorsiklo sa Brgy. San Mateo, Tumauini, Isabela kamakalawa.
Sa report kay Police Major Eugenio Malillin, hepe ng Tumauini Police, agad bumulagta ang hindi pa natukoy na lalaki na umano’y nang-agaw ng motorsiklo ni John Donato na galing sa pagpapakarga ng gasolina dakong alas-9:00 ng gabi.
Agad na humingi ng tulong si Donato at nang respondehan ng mga pulis ang lugar ay nanlaban umano ang suspek sanhi ng shootout. Narekober sa napatay na suspek ang motorsiklo, ang baril nitong cal.38 revolver na paltik at isang plastic sachet ng shabu.