Cavite, Philippines — Bukod sa mga drogang nasamsam sa isang buy-bust operation ng pulisya, nadiskubre rin ang isang bangkay na inilibing sa septic tank ng mga nahuling suspek sa Bacoor City, Cavite kahapon.
Ayon sa ulat mula sa tanggapan ni Police Colonel William Segun, dakong alas-3:00 ng madaling-araw nang ikasa ang buy-bust operation sa Road 3 Tambakan, Brgy. San Nicholas 3, Bacoor City.
Nahuli sa buy-bust ang mga suspek na sina Jimmy Ecleo, Jhune Alexis, Albert Almojuela, Michael Angelo Ranay, Randy Abulencia, Alberto Diche, Arsenio Amante at Jhon Sazar.
Matagal nang may tip sa pulisya na may pinatay ang grupo at duon na nga kumanta si Ecleo na inilibing nila sa septic tank ang isang alyas Buboy sa ginagawang bahay na pag-aari ng mga suspek.
Kwento pa nito, dati nilang kasama ang biktima pero napaghinalaang asset ng pulisya kaya pinatay umano ng grupo at duon na rin inilibing. Agad na tinungkab ng mga awtoridad ang ilalim ng lababo at duon na nga umalingasaw ang masangsang na amoy ng bangkay.
Kilala ang grupo sa illegal drug trade sa lugar at karatig bayan nito at bukod dito ay pawang mga gun for hire rin umano ang mga ito.