Ginang itinumba ng tandem

GUIGUINTO, Bulacan  , Philippines  —  Bulagta ang isang ginang na lulan ng SUV matapos na tambangan at barilin ng riding-in-tandem sa kahabaan ng Brgy. Panginay ng nasabing bayan kamakalawa.

Kinilala ang biktima na si Elenita Lanungan, 48, may asawa ng Camella Homes Barangay Panginay, Guiguinto, Bulacan. 

Sa imbestigasyon ng Guiguinto Police, at base sa kuha ng CCTV footage, habang nagmamaneho ng Isuzu Alterra na walang plaka ang biktimang si Lanungan dakong alas-4:35 ng hapon nang bigla na lang siyang barilin matapos na tapatan ng dalawang lalaki na magkaangkas sa motorsiklo. 

Nagtamo ng isang tama ng bala ng cal. 45 sa kaliwang bahagi ng tenga ang biktima na sanhi ng kamatayan nito.  Agad namang tumakas ang mga salarin matapos ang pamamaril.

Ayon sa kaibigan ng biktima, posible umanong napagkamalan lang ng mga suspek ang biktima dahil sa wala naman daw itong kagalit at tahimik lang na namumuhay.

Patuloy ang isinasagawang imbestigasyon ng Guiguinto Police sa motibo sa pagpatay sa ginang.