LOPEZ, Quezon, Philippines — Hindi na umabot pang buhay sa ospital ang isang 60-anyos na lolo makaraang magtamo ng mga grabeng kapinsalaan sa ulo at katawan nang pagtulungang hatawin ng kahoy ng magkapatid na kapitbahay sa Barangay Binahian ng bayang ito, kamakalawa ng gabi.
Kinilala ng pulisya ang biktima na si Celso Manalo, magsasaka habang tumakas naman ang mga suspek na sina Nickson Utalla at Evelyn Utalla.
Sa imbestigasyon, alas-6:00 ng gabi habang naglalakad patungo sa kanyang bahay ang biktima nang harangin ng mga suspek at walang sabi-sabing pinaghahataw ng kahoy ang kaawa-awang matanda hanggang sa duguang bumulagta sa feeder road.
Kinasuhan na ng murder ang magkapatid na hinihinalang ang motibo sa pamamaslang ay dahil sa matagal ng alitan.