SANTIAGO CITY, Isabela , Philippines — Isang security guard ng isang subdibisyon ang nasawi matapos pagbabarilin ng dalawang suspek na pinaniniwalaang magnanakaw sa Tuguegarao City, Cagayan, kamakalawa ng madaling araw.
Kinilala ng Tuguegarao City Police ang biktima na si Benedict Adviento, 40, nakatalagang guwardya sa Airlandia Home Subdivision at residente ng Panacal Village, Tanza, Tuguegarao City.
Ayon sa ulat ni P/SSgt. Ruben Fernando, dakong ala-1:46 ng madaling araw nang makita ng biktima sa CCTV ang dalawang lalaki na may kahina-hinalang kilos sa harapan ng isang gusali sa binabantayang subdibisyon. Umakyat umano ang dalawang suspek sa pader para makapasok sa subdibisyon. Dahil dito, agad niyang nilapitan ang dalawang lalaki para sana sitahin subalit bigla umano siyang pagbabarilin ng isa sa mga suspek.
Isinugod ang biktima sa Saint Paul Hospital sa Ugac Sur subalit idineklarang dead-on-arrival dahil sa tinamong tama ng bala sa ulo mula sa isang cal. 45.