LEGAZPI CITY, Albay, Philippines — Patay ang isang 35-anyos na mangingisda matapos pagbabarilin ng tatlong nakaalitang lalaki na sakay din ng bangka makaraang magkagirian sa baybayin ng Brgy. Pulanduta sa Balud, Masbate kamakalawa ng gabi.
Napuruhan ng punglo sa katawan ang biktimang si Joan Aristoteles Bantilo, ng Brgy. Tinigban, Carles, Iloilo habang tinutugis na ang tatlong hindi nakilalang suspek.
Dakong alas-6 ng gabi, habang sakay si Bantilo at kanyang mga “crewmember” sa kanilang bangkang “F/B Jaira” nang sa hindi pa malamang dahilan ay nakaalitan ng biktima ang mga suspek na lulan din ng isa pang bangkang de-motor na may marking na “F/B Jocel”. Gayunman, habang nakikipagtalo, biglang bumunot ng hindi malamang kalibre ng baril ang mga suspek at pinutukan ang biktima na tinamaan sa katawan.
Tumakas ang mga suspek habang isinugod sa Jesus Colmenares Memorial District Hospital Balasan, Iloilo ang biktima pero namatay habang ginagamot.