LEGAZPI CITY, Albay , Philippines — Kalaboso ang isang barangay tanod at kasamang obrero na parehong umano’y drug pusher at itinuturing na high value target (HVT) matapos maaresto nang makuhanan ng P1 milyong halaga ng shabu sa inilatag na buy-bust operation ng pulisya, PDEA at militar sa San Miguel Street, Zone-3, Brgy. San Felipe, Naga City, Camarines Sur kamakalawa ng gabi. Kinilala ang mga suspek na sina Roel Lizano, 48-anyos at Carlito Alegre Jr., 37, construction worker, matapos nilang iabot ang droga. Sa ulat, dakong alas-6 ng gabi, sa tulong ng 9th Infantry Division ng Philippine Army at PDEA-5, inilatag ng Naga City Police-DEUT sa pangunguna ni Supt. Errol Garchitorena ang buy-bust operation laban sa mga suspek.
Nang iabot ng mga suspek ang isang sachet ng shabu kay PO3 Anthony John Manaog na umaktong buyer ng droga ay agad silang inaresto ng huli at mga kasamang pulis. Nakuha kay Alegre at Lizano ang 165 gramo ng shabu na nasa P1,112,000 ang halaga at mga drug paraphernalia.