MANILA, Philippines — Patay ang isang hinihinalang bomb courier matapos umanong kumasa sa pinagsanib na elite forces ng Philippine Army (PA) at pulisya sanhi ng engkuwentro sa isang checkpoint sa East Diversion Road, Brgy. Tamontaka 2, Cotabato City kamakalawa ng gabi.
Ayon kay Captain Arvin Encinas, spokesman ng 6th Infantry Division (ID) ng Philippine Army, bandang alas-10 ng gabi nang maganap ang shootout sa lugar nang maglatag ng checkpoint ang 5th Special Forces Battalion ng PA at Cotabato City Police makaraang makatanggap ng impormasyon na may ibibiyaheng mga anti-personnel mines ang mga teroristang grupo sa lungsod.
Sinabi ni Encinas na habang papalapit sa checkpoint ang ‘di kilalang suspek sakay ng motorsiklo, kahina-hinala na ang kilos nito na tumangging sumailalim sa inspeksyon. Nang tangkain ng tropa ng gobyerno na lapitan, agad umanong bumunot ng baril ang suspek at pinaputukan ang mga bantay sa checkpoint sanhi ng shootout. Bumulagta ang ’di pa kilalang terorista at idineklarang dead-on-arrival sa pagamutan bunga ng mga tama ng baril sa katawan.