CAMP JULIAN OLIVAS, Pampanga , Philippines — Isang 81-anyos na negosyante at kanyang tauhan ang nasawi matapos na sumabog ang isang tangke ng oxygen sa isang repair shop sa Doña Maria Subdivision, Barangay Dau, lungsod ng Mabalacat, sa lalawigang ito noong Huwebes ng umaga.
Sa report na nakarating sa tanggapan ni P/Chief Supt. Joel Napoleon Coronel, kinilala ang mga biktima na sina Narciso Bernardo, may-ari ng repair shop at Alejandro Lozano, 54-anyos, helper, residente sa nasabi ring barangay.
Sa imbestigasyon, pasado alas-8:30 ng umaga nang sindihan umano ang acetylene ng isa sa biktima malapit sa tangke ng oxygen na hindi napansin na may leak ang tangke dahilan ng mabilis na pagputok sa tangke.
Sa lakas ng pagsabog, naputol ang isang paa ni Lozano habang sunog naman ang kanang kamay ng lolong si Bernardo.
Nagawa pang maisugod sa pinakamalapit na ospital ang dalawang biktima ngunit idineklara na silang dead-on-arrival ng sumuring doktor.