MANILA, Philippines — Patay ang isang doktor makaraang tambangan at pagbabarilin ng tatlong hindi pa nakilalang salarin sa national highway, Sitio Tinangon, Brgy. Basak, Guihulngan City, Negros Oriental nitong Martes ng umaga.
Kinilala ni Guihulngan City Police Director P/Supt. Mario Baquiran ang biktima na si Adelex Amor, binata, nakatalaga sa Canlaon District Hospital sa Canlaon City at residente ng Dumaguete City na idineklarang dead-on-arrival sa Guihulngan District Hospital dahil sa rami ng tinamong bala ng kalibre .45 pistol sa katawan.
Bandang alas-8:20 ng umaga nang bigla na lamang sumulpot sa lugar ang tatlong mga armadong suspek na katamtaman ang pangangatawan na pawang may taas na 5’6 talampakan. Lumalabas na mabagal ang pagpapatakbo ng biktima kasama si Rosy Aldojesa lulan ng Toyota Vios (AZX-907) at bigla nitong inihinto sa may ginagawang kalsada. Nang bumaba siya sa sasakyan para umihi ay biglang sumulpot sa lugar ang tatlong suspek na magkakaangkas ng motorsiklo at nilapitan ang una saka pinagbabaril.