MANILA, Philippines — Umiskor ang mga sundalo nang masakote ang tatlong miyembro ng mga bandidong Abu Sayyaf Group (ASG) matapos ang engkuwentro nang makorner sa isinagawang opensiba ng tropang gobyerno sa Brgy. Maligay, Patikul, Sulu kamakalawa ng umaga.
Kinilala ni AFP Western Mindanao Command (AFP-Westmincom) Spokesman Lt. Col. Gerry Besana ang mga bandido na sina Gafur Albani Absari, Medzfar Mangabong at Madjid Mangabong.
Bandang alas–9:40 ng umaga nang masukol ng mga elemento ng 5th Scout Ranger Battalion ang tatlong miyembro ng ASG sa magubat na bahagi ng nasabing lugar.
Nauna rito, nakasagupa ng tropa ng militar ang grupo ng mga bandido na tumagal ng ilang minuto at nakorner ang tatlo habang papatakas.
Nabatid na nagsasagawa ng Focused Military Operations (FMO) ang mga sundalo upang masagip ang nalalabi pang mga hostages nang kanilang masabat ang ekstremistang grupo na nauwi sa bakbakan.
Nasa kustodya na ng 501st Infantry Brigade ng Phl Army ang tatlong ASG member para sa tactical interrogation.