Misis kinatay ng selosong mister
MANILA, Philippines — Pinaniniwalaang matinding paninibugho ang nagtulak sa isang mister upang mapatay nito ang kanyang misis makaraang walang habas na inatado ng saksak bago nagtangkang magpakamatay sa nangyaring karumal-dumal na insidente sa Brgy. Madasigon, Molave, Zamboanga del Sur kamakalawa ng hapon.
Sanhi ng mga tinamong tama ng saksak sa iba’t-ibang bahagi ng katawan, wala nang buhay nang matagpuang duguang nakahandusay sa kahabaan ng kalsada ‘di kalayuan sa kanilang tahanan sa naturang lugar ang biktimang si Joy Lumanta Lajos, 37-anyos.
Samantalang ang mister nito na si Weneboy Lajos, 38-anyos ay isinugod naman sa Salug Valley Medical Center sa bayan ng Molave matapos na magsaksak sa sarili sa bigong pagpapatiwakal nito.
Batay sa ulat ng Police Regional Office (PRO) 9, dakong alas-2:20 ng hapon nang makatanggap sila ng tawag mula sa isang concerned citizen sa nakita nitong ginang na duguang nakahandusay sa tabi ng kalsada.
Nagresponde naman ang pulisya kung saan ‘di kalayuan sa kinalulugaran ng ginang ay nakita naman sa pintuan ng kanilang tahanan ang duguang mister na nagsaksak din sa sarili matapos mapatay ang misis.
Lumilitaw sa imbestigasyon na matinding selos ang motibo sa krimen habang positibo namang kinilala ng anak na si Wene Jane Lajos, 17-anyos, ang matalim na kutsilyo na narekober ng mga otoridad sa crime scene na pag-aari ito ng kaniyang ama.
- Latest