LEGAZPI CITY, Albay, Philippines - Bulagta ang isang 54-anyos na lalaki matapos na pagbabarilin sa harap mismo ng kanyang kinakasama habang naglalakad sa Sitio Bucal, Brgy. Poblacion 1, Claveria, Masbate noong Miyerkules ng umaga.
Dead-on-the-spot sa lugar ang biktimang si Pedro Sabaulan habang hindi naman sinaktan ang kinakasama nitong si Elvie Bonggot, kapwa residente ng nasabing barangay.
Ayon sa ulat, dakong alas-5:30 ng umaga, magkasamang naglalakad ang biktima at live-in partner patungong bukid nang harangin ng ‘di kilalang gunman.
Hindi na nakatakbo ang biktima nang biglang ratratin ng suspek na agad nasawi dahil sa tama ng bala sa ibat-ibang bahagi ng katawan.
Agad tumakas ang suspek bitbit ang baril na ginamit sa pamamaslang. Nakuha ng mga pulis sa crime scene ang isang basyo ng bala ng 12-gauge shotgun.