Motorsiklo sinuwag ng trak: 3 patay!
MANILA, Philippines — Tatlo katao kabilang ang dalawang estudyante ang nasawi makaraang suwagin ng isang rumaragasang truck ang kanilang sinasakyang motorsiklo sa Ipil, Zamboanga Sibugay nitong Biyernes ng hapon.
Dead-on-the-spot sa insidente si Ernesto Gargar, 37-anyos, driver ng motorsiklong Honda Wave habang ang dalawang backriders nito na sina Charrize Abundo, 14 at Babymore Sta Ana, 14; pawang estudyante ng Makilas National High School sa bayan ng Ipil ay kapwa dead-on-arrival sa Zamboanga Sibugay Provincial Hospital.
Sa report ng Police Regional Office-9, dakong alas-4:30 ng hapon habang binabagtas ng mga biktima ang kahabaan ng national highway sa Purok Malipayon, Brgy. Buluan nang mabangga sila ng Mitsubishi Fuso Canter (130110) na minamaneho ni Elias Dagopolo. Masyado umanong matulin ang takbo ng truck na nag-overtake sa mga behikulo pero minalas namang mahagip ang motorsiklo sa insidente. Sa lakas ng bangga, tumilapon ang mga biktima na pawang nagtamo ng malulubhang sugat sa katawan partikular na sa bahagi ng ulo na kanilang ikinasawi.
Boluntaryong sumuko sa mga awtoridad ang driver ng trak na nahaharap sa kasong reckless imprudence resulting in multiple homicide and damage to property.
- Latest