HVT todas, 2 huli sa drug ops

CANDELARIA, Quezon  , Philippines  —  Patay ang high value target  makaraang umano’y makipagbarilan sa mga operatiba ng Candelaria Police, Regional Special Operations Unit (RSOU) at Regional Intelligence Team (RIT) habang dalawang iba pa ang naaresto at nakumpiskahan ng baril, granada, mga bala at droga sa isinagawang raid kamakalawa ng umaga sa Sitio Kalamias, Brgy. San Isidro, ng nasabing bayan.

Sa ulat ni Quezon Police director, Sr. Supt. Osmondo de Guzman, kinilala ang napaslang na si Magtanggol Florante de Castro, 41, drug personality regionwide at residente ng nasabing barangay habang nakapiit na sa municipal jail sina Joel Salud at Julius Tatlonghari na nakumpiskahan ng dalawang sachet ng shabu at dalawang granada.

Ayon sa ulat, dakong alas-6:00 ng umaga habang isinisilbi ng mga awtoridad ang search warrant laban sa suspek nang magpaputok ang huli na nagbunsod ng shootout na ikinabulagta nito.

Narekober ng SOCO sa bahay ng suspek ang ilang magazine at bala ng M-16 armalite rifle, carbine at cal. 9mm at 5.87 gramo ng shabu.  Natiklo naman sa loob ng bahay sina Tatlonghari at Salud na hinihinalang gumagamit ng droga.