MANILA, Philippines — Sinalakay ng mga teroristang New People’s Army (NPA) ang construction site kung saan kinulimbat ang mga cell phone at wallet ng mga obrero at guwardiya sa Barangay Bugay, bayan ng Las Navas, Northern Samar kamakalawa ng umaga.
Sa ulat P/Chief Insp. Ma. Bella Rentuaya, spokesperon ng regional police na naisumite sa Camp Crame, naitala ang pagsalakay dakong alas-5 ng umaga.
Gayunman, hindi nakapalag ang mga obrero nang papilahin saka puwersahang kinuha ang kanilang mga cell phone at wallet.
Dalawa ring security guard na kinilalang sina Alex Omanito at Ervin Pinca ang dinisarmahan at tinangay ang kanilang armas.
Tumagal lamang ng ilang minuto ang pangha-harass ng mga teroristang komunista bago mabilis na nagsitakas tangay ang pera at mga wallet.
Binabalot naman ng sindak ang mga residente sa nasabing lugar dahil sa naganap na insidente.