TUGUEGARAO CITY, Cagayan, Philippines — Dahil sa away sa Facebook post, pinagbantaan ang dating councilor at pamilya nito matapos makatanggap ng bulaklak para sa patay sa kanilang gate sa Barangay Centro, bayan ng Buguey, Cagayan noong Biyernes. Sa police report na nakarating kay P/Senior Insp. Rudil Bassit, hepe ng Buguey police station, takot ang nadama ni ex-Councilor Ran-ran Taloza nang mabasa ang katagang “Rest in Peace” sa itaas ng kanyang pangalan sa bugkos ng bulaklak kasama ang pangalan ng kanyang inang si Delia, anak na si Renz at utol na si Rodel. Sinasabing bago pa lamang iniwan ng hindi natukoy na tao ang mga sariwang bulaklak na natagpuan ng pamilya sa gate dakong alas-6 ng umaga. Pinaniniwalaang may nakaalitan sa Facebook post ang utol ng opisyal na si Rodel tungkol sa pagkamatay ng artistang si Isabel Granada na nauwi sa pagbabanta sa buhay nito na isinaad sa comment at ngayon ay sinisiyasat ng pulisya.