LEGAZPI CITY, Albay , Philippines – Nakikipaglaban kay kamatayan ang isang mangingisda makaraang sumabog ang hawak na dinamita sa karagatang sakop ng Barangay Morocborocan sa islang bayan ng Rapu-Rapu, Albay noong Lunes ng umaga. Kritikal ngayong ginagamot sa Bicol Regional Training and Teaching Hospital ang biktimang si Pablo Boral ng nasabing barangay. Ayon kay P/Chief Insp. Arthur Gomez, hepe ng investigation division ng Albay police, dakong alas-9 ng umaga, iligal na nangingisda ang biktima sa pamamagitan nang pagpapasabog ng dinamita. Gayunman, nang sindihan nito ang hawak na dinamita ay biglang sumabog sa kanyang harapan. Agad naman itong nasaklolohan ng ilang mangingisda at isinugod sa nasabing ospital.