KIDAPAWAN CITY, North Cotabato , Philippines - Anim-katao ang namatay habang pito naman ang nasugatan makaraang araruhin ng trak ang apat na motorsiklo sa kahabaan ng Davao-Cotabato Highway sa Barangay Malasila, bayan ng Makilala, North Cotabato kahapon ng umaga.
Kabilang sa mga namatay ay sina Rex Agpala Carino, 27; at Junjun Alimahan, mga nakatira sa Barangay Kibudoc sa bayan ng Matalam, North Cotabato.
Sa inisyal na ulat ng pulisya, patungong bahagi ng Cotabato ang trak (PTM750) ng softdrinks mula sa Davao City nang nawalan nang kontrol.
Gayunman, pagsapit ng trak sa harap mismo ng Malasila Elementary School ay inararo ang apat na motorsiklo na sinusundan nito.
Nadamay din sa road mishap ang isa namang babae na nag-aabang lamang ng masasakyan sa highway ay nahagip din.
Patuloy namang inaalam ang pagkakakilanlan ng apat pang namatay habang nahaharap naman sa kaukulang kaso ang driver ng trak na si Julius Cadaba.