LEGAZPI CITY, Albay, Philippines – Pinaniniwalaang kinainggitang sa pagsayaw ang 16-anyos na binatilyo kaya ito napagtripang saksakin ng hindi kilalang lalaki sa Sitio Taloto, Barangay Capsay sa bayan ng Aroroy, Masbate kamakalawa ng madaling araw. Agad namatay dahil sa tinamong malalim na mga saksak sa katawan ang biktimang si Laurencio Manlangit Jr. ng Barangay Talabaan sa nasabing bayan. Sa ulat na nakarating sa Camp Simeon Ola, pauwi na ang biktima kasama ang ilang kaibigan mula sa sayawan ng barangay nang lapitan at saksakin ng hindi kilalang lalaki. Hindi naman nakapalag ang ilang kaibigan ng biktima dahil sa takot na madamay. May teorya ang pulisya na napagselosan o kaya napagtripan ang biktima dahil sa galing nitong sumayaw.