TUGUEGARAO CITY, Cagayan, Philippines – Napatay ang 21-anyos na driver ng opisyal ng lokal na pamahalaan habang malubha naman ang vice mayor at dalawa nitong alalay sa naganap na pananambang sa Barangay Daquioag, bayan ng Marcos, Ilocos Norte noong Martes ng gabi.
?Kinilala ni P/Chief Insp. Dexter Corpuz, tagapagsalita ng Ilocos Norte police ang napatay na si Lucky Jesrel Rumbaoa habang sugatan naman sina Vice Mayor Jessie Ermitanio, 42; Ricky Florendo, 32; at si Edralene Arellano, 26.
Ayon sa police report, magkakasama ang mga biktima sa Toyota Fortuner (AAR 3215) ni Ermitanio habang nag-iikot sa mga barangay sa bayan ng Marcos nang ratratin dakong alas-7 ng gabi.?
Narekober sa crime scene ang 46 basyo ng bala ng M16 Armalite rifle habang isang cal. 38 revolver na paltik ang natagpuan sa SUV ng mga biktima.?
Nabatid na ang naganap na pananambang sa mga biktima ang nagbigay dungis sa malinis na imahen ng bayan ng Marcos na kilala bilang payapang lugar sa Ilocos Norte kahit na panahon pa ng eleksiyon.