KIDAPAWAN CITY, North Cotabato, Philippines - Patay ang isang barangay kagawad at security guard makaraang salpukin ng Elf truck ang kanilang motorsiklo sa kahabaan ng highway sa Barangay Poblacion, bayan ng Makilala, North Cotabato noong Biyernes ng umaga. Kinilala ang dalawa na sina Paquito Egualan Sarmiento, 58, security guard; at Kagawad Crispin Mier Famulagan, 61, ng Barangay Sto. Niño sa nasabing bayan. Ayon sa police report, magkaangkas sa motorsiklo ang dalawa patungong Kidapawan City nang salpukin ng trak (RJC964) ni Berlyn Jose Quibol, 38, ng Barangay Buhangin, Davao City. Naganap ang sakuna sa harap ng Rock Valley Christian College kung saan nawalan ng preno ang trak kaya nasalpok ang likuran ng motorsiklo ng mga biktima. Sa lakas ng impact ay tumilapon ang dalawa saka nadaganan naman ng sumusunod na truck.