NUEVA ECIJA , Philippines - Kamatayan ang sinapit ng apat na holdaper na lulan ng dalawang motorsiklo makaraang makipagbarilan sa mga operatiba ng pulisya sa inilatag na checkpoint sa Barangay San Roque, bayan ng Guimba, Nueva Ecija noong Linggo ng madaling araw.
Kinilala ang tatlo sa apat na napatay na sina Ronald Fermin, Dodie Fermin, Freddie Villanueva at isang hindi pa kilala.
Base sa police report, nakatanggap ng impormasyon ang himpilan ng pulisya sa bayan ng Guimba na may apat na armadong kalalakihan ang lulan ng dalawang motorsiklo.
Kaagad na naglatag ng checkpoint ang mga pulis sa Barangay Tampac 1 habang inalerto naman ang Police Public Safety Command na ilang metro lang ang layo sa nasabing lugar.
Gayunman, ilang minuto ang nakalipas ay namataan ang dalawang motorsiklo kung saan tinangkang harangin ng mga pulis subalit tumakas hanggang sa maganap ang matinding bakbakan at napatay ang apat.
Narekober naman ang isang cal. 38 revolver, shotgun, mga bala ng matataas na kalibre ng baril, 4 plastic sachet ng shabu, isang botelya ng crystaline substance, at isang Granada.