BULACAN, Philippines – Tatlo-katao na sinasabing nasa drug watchlist ang napatay makaraang kumasa sa pulisya magkakahiwalay na buy-bust operation sa tatlong bayan sa lalawigan ng Bulacan noong Biyernes ng madaling araw.
Kinilala ang mga napatay na sina Jose Alberto “Jopet” Gesmundo, 40, ng Brgy. Caingin sa Malolos City; Alyas Bato ng Brgy. Cupang sa bayan ng Pandi; at si Jerry Pandato, 40, ng Brgy. Malis sa bayan ng Guiguinto.
Base sa police report na nakarating si kay P/Supt. Heryl Bruno, Napatay ng mga pulis si Gesmundo dahil tinangka nitong barilin ang isang pulis na nagpanggap na poseur-buyer sa buy-bust operation sa Barangay Caingin.
Kasunod nito, napaslang din si Alyas Bato na sinasabing kumasa sa buy-bust operation na pinangunahan ni P/Chief Insp. Manuel De Vera sa Brgy. Cupang-Sabana Road sa bayan ng Pandi.
Samantala, kumasa at napatay din si Pandato sa mga tauhan ni P/Supt. Julius Ceasar Domingo sa buy-bust operation sa Brgy. Tabe sa bayan ng Guiguinto.
Narekober sa mga suspek ang 13 plastic sachet ng shabu, 4 pekete ng marijuana, tatlong cal .38 revolver, P700 marked money, talaan ng mga buyer ng shabu at mga personal na gamit.