NORTH COTABATO, Philippines – Tatlo-katao ang naiulat na pinabulagta sa panibagong insidente ng pamamaril sa Barangay Labu-labu sa bayan ng Datu Hofer sa Maguindanao, kamakalawa. Kinilala ni P/Senior Insp. Bryan Balite, hepe ng Datu Hofer PNP ang isa sa napatay na si Roger Baylon Castor, 20, estudyante, ng Barangay Saliao sa bayan ng Esperanza sa Sultan Kudarat habang bineberipika pa ang pagkakakilanlan ng dalawa. Nabatid na pasado alas-11 ng gabi kamakalawa nang makatanggap ng tawag sa telepono ang himpilan ng pulisya kaugnay sa pagkakapatay sa mga biktima. Narekober sa crime scene ang mga basyo ng bala ng M-16 rifle at cal.45 pistol. Blanko pa rin ang pulisya sa motibo ng pamamaril.