MANILA, Philippines – Sa kabila ng idineklarang unilateral ceasefire ni Pangulong Rodrigo Duterte, umatake ang mga rebeldeng New People’s Army (NPA) kung saan napatay ang isang Cafgu habang apat namang kasamahan ang nasugatan sa Brgy. Gupitan sa bayan ng Kapalong, Davao del Norte noong Miyerkules ng umaga.
Ayon kay Army 10th Infantry Division spokesman Captain Rhyan Batchar, pabalik na sa kampo ng 72nd Infantry Battalion ang mga Cafgu nang tambangan ng mga rebelde pagsapit sa Sitio Pamunuan ng nasabing bayan.
Nabatid na dahil sa idineklarang suspension of military operations (SOMO) laban sa mga rebelde ay nagdesisyon ang mga Cafgu na bumalik na sa kampo ng militar subalit naganap ang pananambang.
Bunga ng nasabing insidente ay isa sa mga Cafgu ang napatay na tumanggi munang tukuyin ng opisyal ang pagkakakilanlan dahil kailangan pang impormahan ang pamilya nito.
Kinondena naman ni Army’s 103rd Infantry Brigade Commander Col. Ricardo Nepomuceno ang insidente dahil tumatalima sa unilateral ceasefire ang kaniyang mga tauhan na itinigil muna ang opensiba sa mga kalaban bagay na sinasamantala ng komunistang grupo.
Sa kabila nito, tiniyak ni Nepomuceno na susundin nila ang unilateral ceasefire na iniutos ng Pangulong Duterte pero mananatiling vigilante at nasa defense mode laban sa pag-atake pa ng NPA rebs.