CAVITE, Philippines – Sinalubong ni kamatayan ang mag-ina habang kritikal naman ang mister nito makaraang salpukin ng SUV ang kanilang motorsiklo sa kahabaan ng Governors Drive sa Barangay Mabuhay sa bayan ng Carmona, Cavite kamakalawa ng hapon. Kinilala ng pulisya ang mag-ina na sina Devie Carurucan, 34; at Shane Carurucan, 6, habang isinasalba ang buhay ni Elmer Carurucan, mga nakatira sa Barangay Bancal sa nasabing bayan. Nakakulong naman ang driver ng SUV na si Jeffrey Pamintuan, 30, may asawa, ng Block 31 Lot 6 Phase 6 Icasañas Street, Bahayang Pag-asa sa Brgy. Molino, Bacoor City, Cavite. Sa police report na isinumite sa Camp Pantaleon Garcia sa Imus City, magkakaangkas sa motorsiklo ang mga biktima nang salpukin ng SUV(ZSZ 197) ni Pamintuan pagsapit sa nasabing lugar.