TUGUEGARAO CITY, Philippines – Pinabulagta ng pinaniniwalaang “hired killer” ang isang 54-anyos na pastor ng Bible Baptist Church sa harap mismo ng kanyang paslit na anak sa Barangay Ambalite, Pugo, La Union kamakalawa ng gabi.
Ayon sa report ng Pugo Police, kasama ng biktimang si Rosendo Bula-oy ang 10-anyos na anak na paakyat sa ikalawang palapag ng kanilang bahay nang pagbabarilin ng hindi kilalang gunman.
Mabilis umanong tumambad mula sa kanilang likuran ang suspek na armado ng hindi pa matukoy na kalibre ng baril at saka walang sabi-sabing pinaputukan.?
Agad na nalagutan ng hininga ang pastor sa harap ng tumatangis na anak at mabilis na tumakas ang salarin sakay ng isang itim na SUV.?
Sinisiyasat na ng pulisya ang motibo sa pamamaslang sa nasabing alagad ng simbahan.