SOLANO, Nueva Vizcaya, Philippines – Isa ang patay habang isa ang malubhang nasugatan matapos sumalpok sa isang Toyota Hilux ang dalawang motorsiklo sa bayang ito kamakalawa ng hapon.
Kinilala ng pulisya ang nasawi na si Christian Andaya, 25, ng Barangay Roxas, Solano habang ang sugatan ay nakilalang si Harold Ian Alcantara, 26, ng Barangay Curifang sa nabanggit na bayan.
Lumalabas sa imbestigasyon ng pulisya na dakong ala-1:30 ng hapon habang magkasunod ang motorsiklo na sinasakyan nina Andaya at Alacantara nang bigla umanong lumiko ang kasalubong na Toyota Hilux (SGA 242) na pag-aari ng Local Government Unit ng Kasibu, Nueva Vizcaya at minamaneho ni Dominador Topinio, 58,ng Barangay Alloy, Kasibu.
Una umanong sumalpok ang Yamaha Mio (H6779) na minamaneho ni Andaya kung saan pumailalim pa ito sa loob ng Hilux.
Agad na nasawi si Andaya habang inoobserbahan sa kasalukuyan si Alcantara sa MMG hospital sa nasabing bayan.
Agad naman na sumuko ang driver ng Hilux sa pulisya matapos ang insidente.