MANILA, Philippines - Naging mitsa ng buhay ng isang 54-anyos na mister ang sakit nitong rayuma matapos itong sumpungin ng karamdaman na ikinahulog nito sa sapa sa Brgy. Calsib, Aguilar, Pangasinan kamakalawa ng hapon.
Kinilala ang nasawing biktima na si Nestor Soriano, ng Purok 7, Brgy. Calsib, Aguilar ng lalawigang ito.
Ang katawan ng biktima ay natagpuang lumulutang sa nasabing sapa ilang minuto matapos siyang mahulog sa tubig dakong alas-3 ng hapon.
Sa ulat ng Pangasinan Police, inatake ng rayuma ang biktima habang hawak ang tungkod nito dahilan upang aksidente siyang mahulog sa sapa na siya nitong ikinalunod.
Nagawa pang maisugod sa pagamutan ang biktima pero nabigo ng maisalba ang buhay nito.