QUEZON, Philippines - Kamatayan ang sumalubong sa 33-anyos na van dispatcher na sinasabing hindi kaagad nito naisauli ang hiniram na motorsiklo matapos itong pagsasaksakin ng kanyang kaibigan sa Sitio Abadilla 2, Barangay Cawayan 2 sa bayan ng San Francisco, Quezon kamakalawa ng hapon. Nagmistulang kinatay na karne ng hayop ang katawan ni Wider Villanueva ng Purok 7 sa Barangay Poblacion habang tinutugis naman ang suspek na si Rady Rey ng nasabing barangay. Sa imbestigasyon ng pulisya, dakong alas-2:35 ng hapon nang komprontahin ng suspek ang biktima dahil sa hindi kaagad nito naisauli ang hiniram na motorsiklo. Ikinatuwiran ng biktima na may pinuntahan lamang siya subalit hindi naman tinanggap ng suspek ang tinuran nito hanggang sa mauwi sa mainitang pagtatalo na humantong sa pananaksak.