QUEZON, Philippines – Winakasan ng 75-anyos na ina ang kalbaryo sa kamay ng adik na anak nang ito ay kanyang ipakulong dahil sa panununog ng kanilang bahay sa Purok Santol, Barangay 2 sa Lucena City, Quezon kamakalawa ng madaling araw.
Nakapiit ngayon at nahaharap sa kasong arson ang 33-anyos na suspek na si Erwin Erazo, jobless at nakatira sa nasabing barangay.
Sa salaysay sa himpilan ng pulisya ni Estelita Erazo, matagal na umano niyang pinagtitiisan ang pagiging adik ng kanyang anak at naipasok na umano niya ito sa rehab sa pag-asang magbabagong buhay na.
Gayon pa man, nagpatuloy pa rin ito sa bisyo at kamakalawa ng madaling araw ay sinira nito ang mga kagamitan sa loob ng kanilang bahay hanggang sa sunugin ang buong kabahayan. Hindi na kumalat sa mga kalapit-bahay ang sunog kaya napilitan ang ina na tuluyang ipakulong ang pasaway na anak.