TUGUEGARAO CITY, Cagayan, Philippines – Sumalubong kay kamatayan ang 70-anyos na lolo habang kritikal naman ang lima pang kaanak matapos salpukin ng van ang kanilang sinasakyang traysikel na kuliglig sa kahabaan ng highway sa Barangay Villanueva, San Manuel, Isabela kamakalawa.? Ayon kay P/Senior Insp. Fernando Abugan, hepe ng San Manuel MPS, namatay habang ginagamot sa Roxas District Hospital si Lolo Prospero Cabanit habang nakikipagbuno naman kay kamatayan ang misis nitong si Lola Laudemia Cabanit, mga kaanak na sina Rosemarie Reccion, 48; Marilyn Balinbin, 45; Elmie Azuero, 49; at ang operator ng kuliglig na si Rogie Galasi, 30.?
Nagtamo naman ng galos ang dalawa pang kaanak na sina Charlie Azuero at Kezia Faith Dela Cruz.?
Sa imbestigasyon ng pulisya, sinalpok ng van (RGK 908) na minamaneho ni Kevin Karl Gentiroy ang likuran ng kuliglig ng mga biktima matapos iwasan ang sinusundang motorsiklo na biglang huminto.
Nabatid na ang Mitsubishi canter van ay pag-aari ng AJRJ Trucking Freight Services Incorporated.
Sa lakas ng impact ay tumilapon at nagpagulung gulong sa highway ang mga biktima.
Sumuko naman ang driver ng van sa pulisya matapos ang sakuna.