TUGUEGARAO CITY, Cagayan, Philippines – Patay ang isa sa dalawang mangangahoy matapos atakihin ng libu-libong killer bees sa kagubatan ng Sitio Bual, Barangay Topdac sa bayan ng Atok, Benguet kamakalawa. Sa pahayag ng isang opisyal ng barangay na si Mario Baliwen, natagpuan sa gubat ang namamagang bangkay ni Charlie Mendoza habang natakasan naman ni Romeo Butag ang pag-atake ng mga bubuyog. Samantala, isinugod si Butag sa Baguio City General Hospital and Medical Center matapos itong mawalan ng ulirat dahil na rin sa kamandag ng bubuyog na tinamo sa iba’t-ibang bahagi ng katawan. Nabatid na nabulabog ng mga biktima ang bahay ng killer bees matapos nilang buwagin sa punungkahoy na kinalalagyan ng mga bubuyog.