MANILA, Philippines – Apat na preso kabilang ang isang menor-de-edad na lalaki na may mga nakabinbing kasong pagtutulak ng bawal na droga ang nakapuga matapos lagariin ang rehas na bakal sa likuran ng selda noong Lunes ng gabi sa himpilan ng pulisya sa bayan ng Maramag, Bukidnon. Sa ulat ng Bukidnon PNP na isinumite sa Camp Crame, kinilala ang apat na pumuga na sina Gideon Morala, 36; Rache Margallo, 34; Rodel Caparida, 29; at ang 17-anyos na si Rolly. Lumilitaw sa imbestigasyon, sinamantala ng mga preso ang malakas na buhos ng ulan kung saan nilagare ang rehas na bakal. Nalalagay naman sa balag ng alanganing masibak sa tungkulin ang mga pulis na nagbabantay.