TUGUEGARAO CITY, Cagayan, Philippines – Kamatayan ang sumalubong sa 8-anyos na totoy habang 16 naman ang nasugatan matapos salpukin ng isang truck ang bahay sa gilid ng bundok ng Sierra Madre sa Sitio Abbitil, Barangay Sta. Isabel sa bayan ng Jones, Isabela kamakalawa. ?
Sinabi ni P/Chief Insp. Benjamin Agcaoili, hepe ng Jones PNP, napisak ang biktimang si Randolph Inieva na napuruhan ng toneladang truck na minamaneho ni Augustus Regatis ng Barangay Dicamay sa nasabing bayan.
?Lumalabas sa imbestigasyon na nawalan ng preno ang truck pagsapit sa pabulusok na bahagi ng logging road kaya sumalpok sa bahay ng biktima.
?Ayon kay Agcaoili, tinatayang aabot sa 30-katao ang nakisakay sa truck ni Regatis para mamili sa bayan ng Jones.
Isinugod sa Prospero Bello Memorial Hospital at iba’t ibang pagamutan ang mga sugatan kung saan aabot sa 16 ang nasa malalang kalagayan.
Ang insidente ay nagpapatunay na mayroon pa ring operasyon ng pagtrotroso sa kabundukan ng Sierra Madre.