LEGAZPI CITY, Albay, Philippines – Napatay ang 60-anyos na negosyanteng misis matapos itong pagbabarilin ng dalawang di-kilalang lalaki na nanloob sa kanyang tindahan sa Barangay Pili, bayan ng Magallanes, Sorsogon kamakalawa ng gabi. Hindi na umabot pa ng buhay sa Sorsogon Medical Mission Group Hospital ang biktimang si Rosa Gregory Kumal. Sa ulat ng pulisya na isinumite sa Camp Simeon Ola nag-iisang bantay sa tindahan ang biktima nang pasukin at holdapin ng dalawang armadong lalaki. Nabatid na dumalo sa commencement exercise ang kaanak ng biktima kaya ito naiwan sa tindahan. Sinasabing pumalag ang biktima kaya tinuluyang patayin. Tangay ng mga holdaper ang hindi nabatid na malaking halaga at ilang personal na gamit ng biktima.