MANILA, Philippines - Brutal na kamatayan ang sinapit ng mag-ina matapos na pagnakawan ay pinagtulungang hatawin ng mga di-kilalang kalalakihan na sinasabing miyembro ng Akyat-Bahay Gang sa Barangay San Miguel, bayan ng San Simon, Pampanga kahapon ng madaling araw.
Basag ang ulo ng mag-inang Jovita Salon, 35; at Karl Christian Salon, 9, habang nakaligtas naman ang isa pang anak na 7-buwang gulang kung saan naitago ng nanay nito sa ilalim ng kama sa ikalawang palapag ng bahay.
Samantala, isa sa mga suspek na kaanak ng mag-ina na si Mark Pangan ay nasakote ng mga tauhan ni P/Chief Insp. Michael John Riego, hepe ng San Simon PNP.
Nagkalat ang mga gamit sa loob ng bahay ng mag-ina kung saan nawawala ang mga alahas at malaking halaga matapos na madiskubre ng kanilang kaanak ang krimen bandang alas-4 ng madaling araw.
Nabatid din na walang winasak na mga bintana o pintuan sa bahay kung saan pinaniniwalaang kilala ng mag-ina ang mga kawatan.
Ipinaabot na ng mga kaanak ni Jovita ang insidente sa kanyang mister na nagtratrabaho sa ibang bansa.