MANILA, Philippines – Patay ang driver ng truck habang apat naman ang nasugatan makaraang mawalan ng preno ang kanilang sasakyan at sumalpok sa sementadong pader sa kahabaan ng highway sa Brgy. Langon, bayan ng Tungawan, Zamboanga Sibugay kamakalawa. Kinilala ang namatay na si Wilfredo Mahilum ng Brgy. Zambowood, Zamboanga City. Isinugod naman sa pagamutan ang mga nasugatang pahinante na sina Tomasito Cabatas, Jose Estecomin, Joemari Sumalinog, at si Simon Arnaiz. Lumilitaw pa sa pagsisiyasat na patungong Zamboanga City nang nasiraan ng preno ang 10-wheeler truck (BUC 197) kaya nawalan ng kontrol sa manibela ang driver at sumalpok sa nasabing lugar. Dahil sa grabeng pagkaipit ng katawan ay agad namatay ang driver habang isinugod naman sa pagamutan ang mga kasamahan nitong pahinante.