BAYOMBONG, Nueva Vizcaya, Philippines – Pinabulagta ang 54-anyos na pastor sa Ifugao makaraang ratratin ng mga di-kilalang lalaki sa panibagong karahasang naganap sa Diversion Road, Purok 2 sa Barangay Baretbet, bayan ng Bagabag, Nueva Vizcaya kamakalawa ng gabi. Limang bala ng baril ang tumapos sa buhay ng biktimang si Benedicto Manaol, dating miyembro ng Sanguniang Bayan ng Lamut, Ifugao at nakatira sa Barangay Poblacion East sa nabanggit na lugar. Sa inisyal na ulat pulisya na isinumite kay P/Chief Inspector Chivalier Irringan, hepe ng Bagabag PNP, pauwi na ang biktimang sakay ng motorsiklo mula sa kanyang farm sa Sitio Diffug, Barangay Dagupan ng ratratin ng mga armadong lalaki na lulan ng puting kotse. Sa tala ng pulisya, si Manaol ang ika-6 na biktima ng pamamaril sa nasabing bayan simula noong Mayo 13 kung saan lima sa mga biktima ay pawang nakatira sa Ifugao. Alitan sa lupa at tribal war ang ilan sa mga sinisilip na anggulo ng pulisya.