TUGUEGARAO CITY, Cagayan, Philippines - – Napatay ang bagong halal ng barangay chairman at kaibigan nitong kagawad makaraang pagbabarilin ng isang di-kilalang lalaki sa Barangay Mariquet, bayan ng Solsona, Ilocos Norte kamakalawa. Idineklarang patay sa Dingras District Hospital ang mga biktimang sina Chairman Edgar Paraiso at kagawad Rogel Baguio habang sugatan naman ang anak ni Paraiso na si Justine, 8. Sa police report na nakarating kay Ilocos Norte PNP spokesman P/Supt. Melvin Napiloy, naghahapunan ang dalawa sa grocery na pag-aari ng pamilya Paraiso nang pasukin at ratratin ng di-kilalang gunman. Nauna na ring namatay sa aksidente ang reeleksiyonistang chairman ng Quezon, Naguilian, Isabela na si Ernesto Ramirez matapos sumalpok ang kanyang traysikel sa nakatirik na jeepney sa gitna ng tulay.