Sudya sa katiguwangan
Kasagarang reklamo sa mga sakop sa media nga naka-interview ni suspended Cebu City Mayor Mike Rama mao nga tag-as kaayong iyang tubag kay, bisan unsay pangutana, sal-otan og mga butang nga way labot. Sama sa pagpamaligya og itlog sa Carbon sa iyang kabatan-on.
Apil sa kinaham niyang isingit, nga lisod kaayong putlon labi na kon tugotan siyang moilog sa pagkupot sa mikropono, mao ang pagbalikbalik og pasidungog sa daghan ug dagkong tampo sa iyang katiguwangan sa taas nang kasaysayan sa pakigbisog ug pagpalambo sa Sugbo ug sa nasud.
* * *
Maong daghang nahibung dihang hingpit niyang gibasura ang sakripisyo sa duha niya ka bantogang uyoan batok sa diktadura ni Ferdinand Marcos Sr. sa iyang pagsuporta sa kandidatura ni Presidente Ferdinand Marcos Jr. sa eleksiyong presidensiyal sa 2022.
Pulos gipapriso ni Marcos Sr. silang 1971 Constitutional Convention Vice President Napoleon Rama (gibalhog sa samang selda ni Senador Ninoy Aquino) ug Gobernador Osmundo Rama (house arrest). Pero para sa ilang pag-umangkon angay nga kalimtan na ang kagahapon ug hatagan og mas dakong importansiya ang iyang gibiliban nga higanteng mga proyekto sa mga Marcos.
* * *
Wa pay klaro ang mga sirkumstansiya sa pagkasuspenso ni Rama. Samtang way lalis nga lig-on ang pasangil sa panaugdaog sa iyang administrasyon sa upat ka trabahante sa Assessor’s Office nga wa suweldohi sud sa 10 ka buwan, ang mga suhito sa sistema sa hustisya sa nasud nagduda nga dunay mas hawod nga mga puwersa nga nigamit sa kaso pag-apiki ni Rama.
Maong nabantang ang papel ni Marcos Jr. Mahimong nangiyugpos ug gipasagdan si Rama. Mahimo sang maoy nipa-suspenso niya.
* * *
Kon nituo si Rama sa katalagsaon sa iyang katiguwangan, nagkapuliki nag panagang sa panudya sa mga uyoan. Nga nakatampo tingali sa iyang kalibog. Samtang niinsistir nga gi-intriga lang sa Malakanyang, nihatag og dugang sukaranan sa pagduda ni Marcos ang iyang pahibawo nga atol sa pagkasuspenso mang-recruit og mga sakop sa PDP, partido ni kanhi Presidente Rodrigo Duterte.
Kapait sa nahibiling kapilian ni Rama: Pagluhod aron saligan og balik sa anak nga labing nakapahimus sa higanteng kawat sa diktador; o pag-unong sa dakpuno nga berdugo sa laktod nga pinatyanay sa kapin 30,000 ka biktima sa drug war.
* * *
- Latest
