Magpinsang dalaga timbog sa P1 milyong shabu
NAGA CITY, Camarines Sur, Philippines — Kalaboso ang magpinsang dalaga matapos maaresto nang masamsaman ng nasa P1-milyong halaga ng shabu sa buy-bust operation ng mga pulis sa Brgy. Calauag ng lungsod na ito kamakalawa ng umaga.
Kinilala ang mga naarestong suspek na sina Ronna Geroy Balcueva, 29-anyos na kabilang sa database ng mga illegal drug suspects, residente ng Amarillo St., Clupa at Jacqueline Palacios Geroy, 29-anyos ng Artamisa St., Clupa; kapwa ng naturang lungsod.
Sa ulat ni PRO5 regional director Brig. Gen. Jonnel Estomo, sa tulong ng mga ahente ng Philippine Drug Enforcement Agency (PDEA) 5 dakong alas-5:45 ng umaga ay ikinasa ng mga tauhan ng Naga City Police Office ang buy-bust laban sa dalawang dalaga. Nang iabot ni Balcueva sa poseur buyer ang biniling isang malaking plastic sachet ng shabu na nagkakahalaga ng P75,000 ay agad silang inaresto.
Nang kapkapan, nakuhanan pa ang mga suspek ng isang pakete na may lamang shabu na tumitimbang ng 125 gramo na may street value na P850,020.
Sa kabuuan ay umaabot sa P1,020,000 ng droga ang nakumpiska sa dalawa.
- Latest
