2 motorsiklo nagsalpukan: 2 patay
MANILA, Philippines — Kapwa patay ang mga driver ng dalawang motorsiklo matapos silang magsalpukan sa Cotabato kamakalawa.
Kinilala ang mga nasawi na sina Hermigildo Buenaflor at Nilo Sangco na mga residente sa bayan ng President Roxas, Cotabato.
Ayon sa ulat ng President Roxas Police, dakong alas-8 ng gabi nang maganap ang insidente sa Brgy. Labou, Cotabato City. Papauwi na si Buenaflor sakay ng kanyang motorsiklo galing sa panonood ng Christmas lights decor sa town proper nang makabangga nito ang kasalubong na si Sangco.
Naisugod pa sina Buenaflor at Sangco sa ospital pero kapwa idineklarang dead-on-arrival ng mga doktor.
Nakaligtas naman ang asawa at anak ni Buenaflor na noo’y kaangkas niya.
Sinabi ng ilang residente na wala umanong ilaw ang motorsiklo na minamaneho ni Buenaflor kaya nakabanggaan nito ang kasalubong na motorsiklo.
- Latest