Celtics sunog sa Heat sa Game One
MIAMI — Bumangon ang Heat mula sa 13-point deficit sa first half para balikan ang Celtics, 118-107, sa Game One ng kanilang Eastern Conference finals.
Kumamada si Jimmy Butler ng 41 points, 9 rebounds, 5 assists, 4 steals at 3 blocked shots para sa 1-0 abante ng Miami sa kanilang best-of-seven championship series ng Boston.
Iniskor ni Butler ang 27 points sa second half kung saan itinayo ng Heat ang 20-point lead, 96-76, laban sa Celtics sa 7:33 minuto ng fourth quarter.
Nag-ambag si Tyler Herro ng 18 points kasunod ang 17 markers ni Gabe Vincent para sa Miami habang may 11 at 10 points sina Max Strus at Bam Adebayo, ayon sa pagkakasunod.
Naglista si Jayson Tatum ng 29 points para sa Celtics na naglaro na wala sina starters Marcus Smart (foot) at Al Horford (health and safety protocols).
Humataw ang Miami ng 39 points sa third period at nilimitahan ang Boston sa 14 para angkinin ang 76-64 kalamangan matapos bumalikwas mula sa 13-point deficit sa first half.
Ang tatlong free throws ni Herro ang nagbigay sa Heat ng 96-76 bentahe sa kaagahan ng final canto bago ito naputol ng Celtics sa siyam sa 7:33 minuto nito.
Ngunit muling bumida si Butler para protektahan ang panalo ng Miami sa Boston.
- Latest
