Blue Eagles dinagit ang ika-3 dikit na panalo
MANILA, Philippines — Tumatalas na ang kuko ng Ateneo Blue Eagles matapos nilang dagitin ang 25-14, 20-25, 25-11, 25-14 panalo kontra University of the East Lady Red Warriors kahapon sa UAAP Season 84 women’s volleyball tournament na nilaro sa SM Mall of Asia Arena sa Pasay City.
Kumayod si Faith Nisperos ng 19 points mula sa 15 kills, tatlong service aces at isang block, para sa Blue Eagles na nilipad ang three-game winning streak at ilista ang 3-3 karta.
Bumakas si Vanie Gandler ng 16 points kasama ang 12 attacks, tatlong service aces at isang block upang tulungan ang Ateneo na bumangon agad mula sa pagkakadapa sa second set.
Bumangis bigla ang Blue Eagles sa third frame, nakalamang ng pitong puntos, 16-9 sa second technical timeout sa third frame para magaan na makuha ang panalo.
Para kay Ateneo coach Oliver Almadro, nais pa rin nilang mas maging matatag sa mga susunod na laban upang makamit ang inaasam na korona.
“We’re not counting the streak eh, we just want to be better every game,” ani Almadro.
Nauna rito, muling sinandigan ng De La Salle University ang tikas ni Alleiah Malaluan matapos humataw ng 16 puntos mula sa 15 attacks at isang service ace upang igupo ang University of the Philippines Lady Maroons, 25-12, 25-17, 25-19.
- Latest
