EDITORIAL - Umaapaw ang illegal drugs
Bababa na sa puwesto si President Duterte pero ang ipinangako niyang kalutasan sa illegal na droga ay iiwanan pa rin niyang problema. Sa kasalukuyan, patuloy ang pagpasok ng illegal na droga sa bansa. Kahit may lockdown dulot ng pandemya, patuloy ang dating ng shabu na para bang karaniwan na lamang ito. Noong 2016 na nangangampanya si Duterte, anim na buwan ang binigay niyang taning para malutas ang droga. Pero mag-aanim na taon na siya sa puwesto, eto at umaapaw ang droga. Halos araw-araw, may narereport na nahuhuling tulak ng droga ang mga pulis at Philippine Drug Enforcement Agency (PDEA) at nakakasamsam ng kilo-kilong shabu.
Ang pinakamalaking huli ng PDEA at PNP ngayong buwan ay ang 500 kilo ng shabu na bitbit ng apat na Chinese national sa Candelaria, Zambales. Lumaban ang apat na Chinese sa mga awtoridad at napatay. Ayon sa mga awtoridad, nagpanggap silang buyer ng shabu at nakipagtransaksiyon sa mga Chinese sa isang beach sa Candelaria. Subalit nakatunog ang mga suspect na pulis ang kanilang katransaksiyon kaya nakipagbarilan. Napatay ang apat. Nakuha sa mga ito ang saku-sakong shabu na nagkakahalaga ng P3.4 bilyon.
Ayon sa PDEA, ang apat na Chinese na mga miyembro ng transnational drug trafficking organization. Nagmamay-ari umano ang mga ito ng iba’t ibang negosyo kabilang ang mga resort at fishponds na ginagawang front. Tatlong buwan na umano nilang sinusubaybayan ang mga suspect.
Nakapagtataka naman kung bakit nag-sorry si President Duterte sa pagkakapatay sa apat na Chinese drug traffickers. Kitang-kita naman kung gaano karaming shabu ang bitbit ng apat at kinumpirma ng PDEA na mga miyembro ito ng drug syndicate. Bakit magso-sorry?
Sa China nga, pinapatay talaga ang drug trafficker na mahulihan ng 50 gramo ng droga. Walang pinipili roon, ma-lalaki o ma-babae, binibitay kapag nahulihan ng droga. Marami nang Pinoy ang binitay sa China dahil sa droga pero hindi nag-sorry ang pinuno roon.
Paigtingin pa ng PDEA at mga pulis ang pagmamanman sa mga dayuhan na nagpapasok ng droga. Purihin ang kanilang pagtitiyaga para madakma ang mga salot na drug traffickers. Bantayan naman ang mga port lalo na ang Bureau of Customs na pinaglulusutan ng droga.
- Latest