PNP pabor sa ‘time limit’ sa bibisita sa Dolomite Beach
MANILA, Philippines — Pabor si Philippine National Police (PNP) chief General Guillermo Eleazar sa pagpapatupad ng ‘time limit’ sa mga bibisita sa Dolomite Beach.
Ito ayon pa kay Eleazar ay para narin maiwasan ang overcrowding sa lugar na nagdudulot ng pangamba nang hawaan COVID-19.
Sa bagong panuntunan na ‘cinema approach’ bibigyan na ng mga ticket ang bisita na balido para sa dalawang oras na pananatili.
Ipinagbawal na rin ang mga batang 11-taon pababa sa lugar.
Ayon kay Eleazar, malaking bagay na agad na natugunan ng pamunuan ng Department of Environment and Natural Resources (DENR) ang isyu sa Dolomite Beach lalo pa at dinarayo na ito ng mga gustong mamasyal.
Aminado si Eleazar na nagulat siya sa pagdagsa ng tao sa Dolomite Beach. Aniya, nakita sa mga ito ang kasabikan na makapamasyal at makabalik sa normal na sitwasyon.
Nagpasalamat naman si Eleazar sa mga netizens na pumuna sa ‘overcrowding’ na nangyari sa Dolomite Beach na lantarang paglabag sa minimum health protocols.
Isa itong malaking kontribusyon para maisaayos ang sistema ng pagtanggap ng bisita sa Dolomite Beach.
- Latest