Mga nagbabalak magpaturok ng booster shot binalaan ni Yorme
MANILA, Philippines — Binalaan ni Manila City Mayor Isko Moreno ang sinuman na magpaparehistro sa ‘vaccination program’ ng siyudad ngunit target na makakuha ng ‘booster shot’ na huwag nang ituloy ang plano dahil maaaring may kaharapin pa silang kaso.
Sinabi ng alkalde na dapat unawain ng publiko na hindi pa talaga inirerekomenda sa ngayon ang ‘booster shot’ o ikatlong dose ng bakuna dahil sa nararanasan pa rin na kakapusan sa suplay ng Pilipinas.
Dahil sa pagsingit ng iba para makakuha ng booster shot, pinagkakaitan naman nila ng pagkakataon ang ibang kababayan na maproteksyunan din ang mga sarili laban sa COVID-19. Nasa proseso pa nga ang pamahalaan sa paghahanda para mabakunahan naman ang mga populasyon na nasa edad 12-17.
Iginiit ni Moreno na huwag nang magtangka ang sinuman dahil sa siguradong matutukoy sila ng kanilang mga opisyales sa Manila Health Department at maaari pang masampahan ng kaso tulad ng ginawa ng ilang lokal na pamahalaan sa Metro Manila na nakadiskubre ng ganitong panlalamang.
Kasabay nito, inanyayahan din naman ni Moreno ang mga motorista na magparehistro online para sa 1,400 drive-thru vaccination slots sa Quirino Grandstand na bukas na mula Setyembre 20 hanggang 26, 2021.
Nilinaw ni Moreno na ang mga motorcycle riders ay hindi pinapayagan sa mga drive-thru vaccination site gayundin ang mga walk-ins.
Tanging mga four-wheeled vehicles ang pinapayagan sa mga drive-thru vaccination sites. Kailangan lamang na magpareserba ng slots at maaari nang magsama ng tatlo pa para sa kabuuang apat kada isang sasakyan.
- Latest
