Athletics team bumida sa 3 ginto ng Pinas
MANILA, Philippines — Humakot pa ang Team Philippines ng tatlong gintong medalya mula sa track and field squad sa pagpapatuloy ng 12th Asean Para Games na ginaganap sa Morodok Techo National Stadium sa Phnom Penh, Cambodia.
Rumesbak si King James Reyes nang pagharian nito ang men’s 800 meters T46 sa bilis na dalawang minuto at 13.22 segundo kung saan tinalo nito sina silver medalist Muhamad Ashraf Haisham ng Malaysia at bronze winner Tran Van Duc ng Vietnam.
Magandag panalo ito para kay Reyes na nagkasya lamang sa pilak na medalya sa kanyang unang dalawang events — sa 5,000m at 1,500m.
“Ang pamilya ko po ang inspirasyon ko,” ani Reyes.
Sumama rin sa selebrasyon sina throwers Rosalie Torrefiel at Andrei Kuizon na kumana ng tig-isang ginto sa kani-kanyang events.
Nanguna si Torrefiel sa women’s javelin F11 habang naghari naman si Kuizon sa men’s shot put F54/34.
“Our goal is to improve on our six gold last time and we’re close to achieving that,” ani athletics coach Joel Deriada.
Sa kabuuan, mayroon nang 15 ginto, 18 pilak at 18 tanso ang Pilipinas sa APG sapat para sa ikalimang puwesto.
Nangunguna ang Indonesia na may 71-61-41 kasunod ang Thailand (46-49-36), Vietnam (31-29-45) at Malaysia (30-23-14).
“We’re still on target in surpassing the 28 gold medals who won last year in Surakarta,” ani PSC commissioner and chef-de-mission Walter Torres.
Sa Morodok Aquatics Center, nakahirit lamang si Ariel Joseph Alegarbes ng pilak sa 100m butterfly S14 tangan ang naitala nitong 1:00.73.
- Latest
